Batiruh anak intan lamiang
Batiruh anak kaleka huang
Sarai bapam hindai halisang
Batiruh anak je puntir busu
Batiruh anak aluh hanjulu
Batiruh anak ela ikau ridu
Pandehan indum barapi manjuhu
Gitam andau jadi halemei
Katawam bapam sambil pehe atei
Hanjewu jewu bapam namuei
Manggau akam anak burung punei
Ela anak santar manangis
Atei bapam sama kilau hiris
Batiruh anak keleh benyem tunis
Danum matan bapam hdk mahantis
Batiruh anak malati kambang
Pandehan indum hanjulu halisang
Kasusah belom ela itah mangganang
Kapehe jituh dia sapanja-panjang
Jewu bapam handak haguet
Manggau akam anak kalawet
Batiruh anak ela ikau carewet
Pandehan indum munduk manjawet
Batiruh anak andau handak ujan
Kasusah belom ela insanan
Kanai balau dia ulih nahan
Bapam hetuh atei marawan
Mudahan anak mangat batiruh
Bapam manuyang marak atei lenyuh
Mudahan tege kapasin taluh
Andau jewu dia kalotuh
Batiruh anak je bawi nyai
Sanang atei aluh huang nupi
Ikau melai keleh rati-rati
Bapam namuei dia akan tahi
Bapam tulak atei babehat
Pasi indum mahaga ikau kabuat
Kilau kayu tajawut bara uhat
Mudahan bapam buli salamat
Ayun tuyang je ayun tuyang
Batiruh anak eka kasayang
Jewu bapam haguet halisang
Manggau akam anak burung tingang
Bapam namuei ka padang himba
Haguet hanjulu malihi huma
Pasie indum kabuat mahaga
Maurus ikau puna dia tau laya
Batiruh anak ela galisah
Ela mangganang aluh belom susah
Bapam halisang mudahan jeleng dumah
Maimbit tambang akan kaluarga itah
Kieeeww!
Bahalap tutu lirik karungut jituh, laku ijin copy paste lah min.
BalasHapusTege kelanjutan kurungut nah pahari
BalasHapuspasi ttu auh lirik karungut tuh, balaku izin copy
BalasHapusMohon ijin aq coba ngarungut ah lah...������
BalasHapus