SANSANA KAYAU

Oooii...oooi...nanai....nanaii..nanaii...
Oooiii...sat ku manyaruan nanyam huang manapa kamba jela marak kataungku sama baya-baya, hapangku manyupa pahari tundah kula hong dunia maya bara ngacu ngawa bakas tawela je dia ulih ku manyundau hong dunia jeeee...nyaaata....eeeee..

Oooiiii....palua ku ndai sanakayau pulang olon lewu Panarusan Purang bara jaman usang hapangku manyapai rawei jang manekang hambaruang je santar pehe hetang...gawin mangganang karusak petak danum minjam tingang je lihi tambi bue taaaatu....hiaaaang..eeeee...

Oooiiii....iiii....amon dia ita sama-sama umba manggatang saritan Dayak basewut je dia baya suang auh sanakayau karungut...lepah ndai ita sama kilau jukung je kahem leteng palus dia tau lembut...gawin ita lalau mikeh ngarekut hagenjeh kuluk tut manaharep kamakam kalonen je dumah bara silan laut....je hawang palepah paruhut panatau utus ita je Dayak meeeenteeeng...mamuuut..eee.

Oooooiiii...nanai....nanai...nanai..
Ooooiiii....nara ku kaka Pang Fani Sergius F. Tigoi pandeta bakena je are kataui manapa auh sansana...je halajur mangarendeng ita olon are hapa auh je sama kilau ndare...auh hai sama kilau hatis danum ucan wayah pandang mambisa petak bararak marekang...hapa mamatih huang je halajur manangis hetang...mangat ita kawan tawela ilah laya satiar usaha manyambung sakola...gawin amon ita tau pintar harati sama kilau pisau ambang je banyehi, dia ndai ita lalau kecau balihi belum ngasi-ngasi nginjak ngihik olon sama kilau apis parei je dia...baaaaaartiii....eeeee.

Ooooiii...tuh tukep ndai ita hawang mamilih bakas lewu je ngindu ta akan kapala suku...ilah ndai ita sama arep laya hakalahi karidu sama kilau pusa asu je puna metu...mangat dia lewu human ta hancur lulu lepah kehu jari kawu ngindu kawan kalonen babungu....keleh ita sama barendeng mangumang belum panjang mangat sanang dia kalahi parang sama jaman asang...mangat sewut saritan Dayak betang lembut lapang segah kancang kilau sumbu hunjung gunung je baaalawaaa....taraaaaang...iiiii.
Kieeeeeww!!

SUNGEI KATINGAN JAMAN HURAN

Manyarita pambelum itah jaman huran
Katinduh belum batantu kamean
Halajur maleket melai ingatan
Saumur belum jadi kenangan

Belum saran sungei Katingan
Kenangan jite dia kan nihau nganan
Haluli ingat sama kilau tehau nduan
Mangat hong atei tuntang parasaan.

Danum badehes bara hila ngaju
Danum katining tengan Hatala Ngambu
Danum barasih bara uhat kayu
Ie mambelum uras kare satua metu.

Sana andau jadi balawa
Ikei balua bara pasah huma
Tulak kan sungei satiar usaha
Kan padang himba malan manana

Hila timur hayak matanandau lembut
Pahayak riwut ambun hadurut
Ikei malalus gawi sama kilau bahut
Atei sanang jaton kapungut

Aluh andau masih hanjewu
Anak tabela mandui sahewu
Hanangui habajau puna mangat tutu
Marak angat kare sadingen bulu.

Ewen bawi munduk hunjun batang
Bahalap tampayah kare bawi bujang
Bapenyau mampukan sambil hureh bangang
Malalus gawie hong atei sanang

Danum katining mahasur masuh
Aluh iihup dia usah lontuh
Danum barasih jadi obat ampuh
Kalonen marusak jaton manderoh

Sapanjang sungei ikei mambesei
Burung tajaring tarawang haretei
Anak buhis tuntang anak bakei
Hanjak rantang nanture ikei

Hunjun batang kayu je gantung
Eka nyarangan je burung tiung
Ewen hanak aman ngalindung
Jaton oloh manawan burung

Burung punei kea burung tingang
Tatawang randah bilang ulih njapang
Are panginae belum mangat sanang
Bua lunuk hapus biling tewang.

Huang danum sungei je katining
Lauk baung tuntang lauk tabiring
Lauk mangat puna jaton banding
Are manungap intu saran tiwing

Lauk balida kea lauk tampahas
Are tutu wayah danum soho daras
Pasti dinun asal manggau pahias
Masang buwu pangilar mahin tau uras

Kamangat belum dia ulih insanan
Sanang atei tuntang pikiran
Kejau bara karusak jaman
Imbelum awi alam lingkungan

Tutu jaton are harta banda
Jaton amas haramaung balanga
Tapi belom angat melai sorga
Petak danum panatau barega

Belum je tinduh jadi inenga
Bahu himba metu satua
Lauk hai kea bilis banta
Uras tege sukup sadia

Sungei Katingan intu jaman huran
Amon aku manduan akan tampengan
Kilau lewu sorga je gitan
Hete kataun Hatala imparahan

Manyarita pambelum jadi ihalau
Kanangan je dia inganan nihau
Indu paingat hong harian andau
Anak jarian dia kan puji sundau

Kalote auh ingesah ku isut
Pahayak timang tandak karungut
Tahiu kenanganku je santar lembut
Tarima kasih aku manyewut.

TAMUEI BURUNG TAJARING Part. 3

Manyambung tinai kesahku isut
Pahayak riwut bahing karungut
Mahasil gawi andau handak kaput.
Salamat halemei aku manyewut

Mangumang ampin katika huran
Metuh garing mawi jalanan
Malihi lewu eka garing inakan
Lewu saran batang danum Katingan

Lewu kurik Panarusan Purang
Lewu asal ain tatu hiang
Utus jereh ayun Kayau Pulang
Intu tumbang Sungei Tamiang

Marak atei pehe dia gampang
Tajaring kurik nampara tarawang
Petak lombah akan ingumbang
Belum bahalap handak injapang

Metuh Tajaring mawi jalanae
Malihi kakare kulae jalahae
Atei pehe dia ulih mahilae
Manirok jite jatun haranae

Malihi lewu Tumbang Panggu usang
Pahayak hamauh kanderang Tingang
Mawi tamuei tulak halisang
Malihi danum sungei bahandang

Burung kurik mangancang palapas
Mangumbang petak danum je luas
Kapungut atei huang je puna mias
Maklum belum saraba tapas

Mangganang ampin nasib garing jeha
Kejau bara kare tundah kula
Mikeh belum hayang banaya
Inamput awi karamin dunia

Manirok ampin akan taluh kinan
Baju pakaian akan indu hapan
Huma serok eka nyandehan
Tajaring kurik are pikiran

Tarawang kan kueh riwut manamput
Tajaring miar marak atei pungut
Tekad atei dia nanture likut
Aluh mikeh hagenjeh utut

Tajaring miar ngabuat bewei
Mambelum arep hong eka tamuei
Kula jalahan intu beken sungei
Aluh hakejau tapi santar hong atei

Amon kapehe kinjap manaripi
Atei huang ela sampai basingi
Dengan Hatalla balaku asi
Mangat kahandak tau manjadi

Balaku Hatalla mahaga bereng
Mangat belum halajur barendeng
Mingat arep dia mamut menteng
Hatalla bewei tempun tahaseng

Are bulan baganti nyelu
Tau atei paham taharu
Danum mate mahantis nanturu
Tajaring kurik handak buli lewu

Tege wayah tuntang katika
Tajaring kurik tau dumah maja
Manyundau kakare je tundah kula
Kahanjak atei dia ulih inyarita

Panarusan Purang masih kilau huran
Aluh jaman baganti jaman
Kanangan kurik dia kan nihau nganan
Akan paingat andau harian

Budaya asli segah ihimbing
Karungut tandak masih tarahining
Sansana kayau puna jatun banding
Pahayak kacapi garantung suling

Panarusan Purang lewu saran sungei
Lewu asal tatu hiang ikei
Aluh kakejau kakare utus namuei
Lewu Kayau Pulang tege hong atei

Kalote isut ingesah hanjulu
Pahayak riwut rawei balemu
Ampin jalanan malihi lewu
Mudahan tau akan indu suntu

Mudahan akan tanding tampengan
Suntu bahalap tau induan
Pangalaman papa keleh inganan
Akan tingak ajar anak jarian

Narai maksud sarita tuh ingesah
Akan kakare je kula tundah
Dia awi kalabih bara uras itah
Baya manahiu ampin sejarah

Mangat itah dia mangalapean
Lewu asal eka itah inakan
Sajarah belum jite pangalaman
Jite uras awi asin Tuhan

Kieew..

TAHIU UTUSKU Part.6

Dia sukup kotakku manyampai tandak
Tahiu kapasin utus batang petak
Kapehen huangku jatun ekaku maandak
Danum matangku batusuh nampurak

Kilen ampie atei dia bahimang
Sama ihiris sambilun humbang
Manyeneh kapasin utus Dayak usang
Huang kapehe je dumah manyarang

Hamauh mina bara Kalawa
Dohop aken ikei ela nalua
Lepah lingis ndai kare kabun gita
Jadi amuk awi apui seha

Kilen ampie manggau ongkos balanja
Amun jadi jatun satiar usaha
Jatun akan pili behas gula
Bapander ie marak danum mata

Hakotak mama bara lewu Bontui
Bapander marak tangis tungu-tungui
Musibah jetuh dia mampahurui
Lepah kabun ikei jadi kinan apui

Lime nyelu ikei mahaga
Are tanaga tuntang biaya
Jikau harapan akan andim sakola
Ije ka upun mahin jatun batisa

Hasupa dengan mama bara Sakakajang
Manyarita angat kapehen huang
Handau hamalem mahampas uhat tulang
Apui mahamuk dia ulih ilang

Nihau kabun nihau kea harapan
Kilen ampie pakanan anak jarian
Jete usaha bara jaman huran
Satiar je beken dia ikei katawan

Dohop ikei kare tundah pahari
Kajake jetuh dumah manaripi
Ela keton benyem ela ketun suni
Nanture ikei belum asi-asi

Dohop ikei tuh kare tatu hiang
Danum matan ikei jadi lepah keang.
Kejau je manenga akan ikei kasanang
Petak danum je lihim mawi ikei hetang

Amon wayah pandang tuh jadi dumah
Kare taluh imbul ikei bakehu lepah
Rajaki panatau je harap dumah
Tapi sial kawe akan ikei je buah

Apui bilang dia ulih mbelep
Awi gambut dia ndai bisa lelep
Parit inggali sambil babute ngambutep
Kapehen ikei puna sukup genep

Dia ulih ngesah anak jarian ikei
Satiap andau minyup racun mampatei
Oloh bakas je kueh bewei
Pasti manyandang kapehen atei

Petak danum ije iharap
Akan belum tau sanang bahalap
Tapi je dumah musibah tantilap
Utus ikei tau nihau lilap

Narai bukue taluh tuh manjadi
Petak danum mambaleh mawi
Dengan ikei ie batantu basingi
Awi kalonen pintar tapi dia harati.

BELUM BAKALUARGA (tingak akan awang hatue)

Pahari handiai hong dunia maya
Aku paramisi manyampai tandak sansana
Ampun maaf amon dia sangaja
Manyinggung parasaan kare tundah kula

Tahiu kaluarga aku handak mangumang
Je tege inirok ku intu atei huang
Katahin ku belum je hindai lalau panjang
Auh jituh dia akan hureh bangang

Kaluarga itah te harta barega
Ie panatau panengan Hatalla
Akan itah melai dunia
Ela sampai itah manyia-nyia

Ela tagal tinkes karamin dunia
Apalagi ganan kare bujang tabela
Itah hatue tau layau gila
Marusak pambelum kare rumah tangga

Awi aku jadi mananture
Ampin kalemo itah awang hatue
Talingau awi karami kalonen are
Kaluarga itah dinun kapehe

Tagal kahalap bawi je beken tinai
Janji je sulak dia itah mingat hindai
Kaluarga je aton nalua tabangkalai
Ingat belum baya hanjulu haliai

Belum bakaluarga dia akan hureh habaka
Tege hubungae huang alam matei jeha
En itah tame sorga atawa naraka
Jite inentu intu hetuh kea

Aloh bahali keleh itah satia
Keleh mikeh baya dengan Hatalla
Ela manumon kipen tampayah mata
Kahandak isi te puna tingkes samata

Bujur belum puna are galombang
Tege katika itah tau pehe hetang
Ela maandal kaabas tuntang kagancang
Nyarah hong lakudoa jite mambatang

Huang belum itah bakaluarga
Dia baya haranan parasaan sinta
Dia kea awi kahalap bau mata
Jete uras jadi iatur awin Hatalla

Amon mahapan angat parasaan itah
Angat sinta puna tau nihau lepah
Hete kaluarga tau rusak goyah
Hong lakudoa keleh manyarah

Apalagi amon tege anak jarian
Parasaan kabuat ela ndai mahapan
Gagenep atei tuntang akal pikiran
Manahiu pambelum ewen andau harian

Ela awi kalahin je itah bakas
Pambelum ewen tau hancur uras
Ela itah belum palalau tulas
Baya mamikir parasaan arep budas

Itah hatue jatun je sempurna
Kinjap itah tau talingau laya
Manumon kahandak kare isi daha
Tujuan belum tau itah ngalapea

Ela mitung bereng santar barigas
Metuh tabela puna gancang abas
Tege katika itah tau bakas
Peres panyakit manggapi uras

Dengan eweh itah balaku awat
Metuh kalemo kare tulang uhat
Dia mungkin itah maurus arep kabuat
Rantep kaluarga itah tau sanang mangat

Aku mampingat kula handiai
Je wayah tuh handak pisah darai
Ela nantumba katekang atei hindai
Belum sanang uka itah tau sampai

Itah hatue tuh puna kapala
Tukang kamburi akan kaluarga
Amon itah mimbit kan jalan je sala
Kaluarga itah tau sasat calaka

Bujur jetuh dia kamangat itah mangotak
Amon belum jadi tantihu rusak
Mudahan asi akan itah inampuhak
Pambelum itah Tuhan mangilak

Dia haranan aku tuh tamam pintar
Manyampai auh sama kilau pakar
Mudahan itah tau sama balajar
Mangat belum tau segah tanggar

Sampai hetuh auh tandak kesah
Manahiu auh tuh bilang dia tau lepah
Mudahan Hatalla mandohop uras itah
Mangamburi kaluarga tau bujur buah

Kieeeeww !!

MANGUMANG KABAR BARITA

Paramisi aku handak mangotak
Pahayak auh karungut tandak
Tahiu pambelum je aton hunjun petak
Jadi gitan nampara rusak

Amon itah mangumang auh barita
Tahiu ampin kadaan dunia
Santar ingabar akan kalonen rata
Keleh barendeng tuntang ela laya

Petak danum eka itah melai
Jadi usang tuntang bakas haliai
Kilau kayu rebuk kana uret luai
Handak balihang hanjulu tinai

Kilau auh je jadi insanan
Awi kare Nabi intu jaman huran
Tanda-tanda jadi nampara gitan
Uras je belum akan matei nduan

Tege kabar intu ngaju ngawa
Kilau auh suara trompet sangkakala
Tege tahining bara hunjun angkasa
Deroh kare pakar umba marima

Intu silan banua je beken
Kabar lasut andau dia lue-luen
Main ribu matei itah kalonen
Oluh are uras mikeh tarewen

Tege hindai kalonen hapatei
Sakian koyae ewen nasah namuei
Mandai kapal kare jukung besei
Hadari ka laut tame akan sungei

Tagal keyakinan tuntang agama
Tagal ekonomi tuntang harta banda
Tau perang are negara
Kahancur kalonen jadi nampara

Oluh pintar tuntang harati
Mawi sanjata akan hakalahi
Akal kalonen palalau rusak jadi
Uras genep auh kare Nabi

Kalonen tatau hakalahi ridu
Manyuang kanai dia tau kuntep penu
Oluh je miskin are matei balau
Jatun regae sama kilau metu

Beken hindai intu lewun itah
Ampin karusak dia ulih ngesah
Uras palsu jatun je asli tuntang sah
Bara behas sampai kare ijazah

Ampin dunia jadi handak tambalik
Behas panginan nampa hapan plastik
Oluh layau tagal kare batu akik
Bara je bakas sampai anak kurik

Tahiu tinai kalonen sarakah
Sasar are jajuan batambah
Oluh luar je taheta dumah
Petak danum parusak lepah

Manyeneh barita intu kanih kante
Tahiu ampin kalonen are
Aku mangumang munduk manure
Tirokku pandak dia ulih marima jete

Tuhan maatur uras taluh je belum
Uras bangsa kea kakare kaum
Metu satua tuntang petak danum
Kare kahanjak kea tangis tatum

Itah kalonen baya manyarah bewei
Petak jetuh baya eka namuei
Belum hanjulu pandehan matei
Hanjewu bahalap, nihau andau halemei

Itah belum baya hanjulu
Kilau kahalap je kambang uru
Bahalap mangambang andau hanjewu
Andau halemei baduruh balayu

Awi te pahari keleh marima
Ampin pambelum melai dunia
Ela irusak dia baramana
Keleh manyarah baya akan Hatalla


Kieeeew!

TAHIU UTUSKU Part.5

Tege hindai tatampayah mate
Amon sonsong aku kan pasar hete
Utusku gitan nampara kan sila sare
Awi pandumah kalonen are

Ewen je bajual mandinun eka
Maampar jualan hong hunjun meja
Uras oluh bapander habasa
Utusku asi-asi munduk hila penda

Mina ewen due te oluh Kalawa
Taluh je njual sama niha-niha
Dawen jawau tuntang baluh bahenda
Keleh amon tege hasil akan imbit huma

Narai je ikehku jadi nampara gitan
Utusku manyare akan hila saran
Awi dia siap kare kula jalahan
Naharep ampin kare persaingan

Awi petak danum itah jari imanja
Akan belum uras tege inyadia
Tapi jaman barubah palalau gila
Utusku tagilas kan serok penda

Petak danum itah jadi irampas
Eka belum lepah induan uras
Kilen ampim dia tau rise rahas
Bajual bajaja kataun itah nahapas

Nambah hindai utusku puna pamasi
Rancak mangalah dia maku kalahi
Jite ingguna kalonen dia paduli
Balalu utusku kejau balihi

Tege je manyewut kasalan itah kabuat
Belum bakulas dia bagawi bahimat
Dia sanggup bagawi babehat
Kilen ampi tau sanang mangat

Itah kalah awi oluh je dumah
Bagawi babehat manduan upah
Manyirok mamenda mahin nyamah2
Manduan atei kare utus itah

Aku basingi ewen hamauh kalote
Aloh je bujur kakare auh te
Utusku mangat dia puji pehe
Sahindai pandumah kalonen are

Petak danum eka ikei bara sulak
Kuntep panatau tuntang anis enyak
Dia usah bagawi sampai ebes nampurak
Uras tege narai je ingahandak

Awi te pahari kula jalahan
Nyadia arep narima perubahan
Itah belum dia kilau huran
Uras sadia tuntang sukup simpan

Dunia jituh nanpara ganas
Ela laya, itah ela bakulas
Amon dia itah lumat kana gilas
Tarung saritan utus tau nihau uras

Anak jarian nyuhu sakola
Ela nalua dia baramana
Mihup oplosan babusau malaga
Daras maobat kuman kare ganja

Mangat utus lampang ka bentuk
Dia hadari kan sare seruk
Mangat lapang kare itung tirok
Dia jadi ikuh tapi jadi takuluk.

Kieeeeew!

BAWIN DAYAK

Salamat hamalem je kula tundah
Hong tandak karungut hasupa tinai itah
Aku manyarita ampin kare tampayah
Hong pawai budaya itah Kalimantan Tengah

Huang tandak aku manimang
Ikau Bawin Dayak intan lamiang
Kilau kahalap malati kambang
Bau matam pantas akan ingenang

Bara kejau aku mananture
Ikau kumi-kumi hayak tatawe
Manari balemo je ampin lenge
Baduruh jantung oluh hatue

Lalehan kahalapmu intan garinda
Ikau Bawin Dayak puna barega
Bau matam tarang puna bacahaya
Ikei nanture sampai dia takirep mata

Bawin Dayak bahalap tutu
Sambil tatawe manari balemu
Ikei hanjak dengam tapasuru
Ikau pantas eka atei taharu

Bawin Dayak harta pusaka
Ikau ingalindung kare Pangkalima
Ela oluh manderoh ikau dia baramana
Tau kana singer tuntang kaji patua

Bitim baputi pupusmu malisen
Kahalapmu kambang puna labien
Tangkahalap bawi intu kalonen
Manampa kahirin utus je beken

Aku mameteh ikau kambang malati
Keleh mahaga arep je rati-rati
Ela belum sara manyi-manyi
Manumon karusak kalonen rami

Keleh harati mahaga arep
Dengan Hatalla ikau baketep
Ateim balawa dia babute ngambutep
Kilau sumbu je tarang dia tau belep

Awi kakumbang puna are tutu
Manggau kambang manduan madu
Amon kahalap kambang nihau balayu
Dia tau kan haluli sama kilau helu

Pahayak pahiau suling balawung
Pahayak kacapi gandang garantung
Ikau Bawi Dayak tarawang gantung
Sewut saritam lampang batarung

Dia sukup auhku manimang ikau
Ikau Bawin Dayak je panjang balau
Kahalap ampim puna palalau
Tarung saritam dia akan leteng nihau

Sampai hetuh auh karungut pandak
Tahiu kahalap ampi je Bawin Dayak
Mudahan pahari uras mangilak
Laku ampun amon tege sala kotak

Kieeeeew!

TAHIU UTUSKU Part.4

Hasundau tinai itah je tundah kula
Mahalau karungut tandak sansana
Pahayak riwut aku dumah maja
Kakare utusku intu ngaju ngawa

Tege hindai manampa atei babehat
Mananture ampi gawi ewen pusat
Kare rencana jadi inyusun bahimat
Mangat utusku lepah nihau lumat

Ewen mangirim oluh luar dumah
Kalonen are bara lewu dimpah
Petak danumku handak induan lepah
Atei kupehe angat bahimang bakarah

Kilen ampi nasib anak jarian
Amon petak danum irampas duan
Utus Dayak belom bara jaman huran
Handak inyare, panihau nganan

Awi alasan itah ije republik
Hak ikei lepah kana hunjek nandik
Hong petak jituh ikei bara kurik
Anggap keton ikei sama kilau bitik

Keton pusat puna dia sanonoh
Otonomi daerah jite baya auh
Kilau handipe keton mawi ikei hetuh
Ilapas kuluk, himbing keton ikuh

Gawin keton tutu mangapehe
Ikei daerah hetang hante-hante
Kare panatau ikei je batantu are
Lepah induan akan keton hete

Kare kayu tuntang amas lamiang
Uras panatau ayun tatu hiang
Induan keton sampai lepah keang
Utus ikei baya malalap buang

Nambah hindai kabar je taheta
Keton mangirim kalonen main juta
Utus ikei sama niha-niha
Akan manyare kan serok penda

Ikei Dayak utus je ramah
Dengan keton ikei tarus mangalah
Tapi kasabar ikei sama tau lepah
Ela manampa kare nayun ikei dumah

Manahiu taloh tuh aku puna bakulas
Mawi atei ku tau rise rahas
Amon kasingi ikei jadi palalau daras
Hapus petak kareh tau tombur uras

Ikei utus paham pamasi
Keton ianggap ikei akan pahari
Tapi ela manampa ikei basingi
Keton tarewen sampai huang nupi

Maaf pahari amon aku nahiu
Kapehen atei kilau mambatu
Awi gawi ewen intu pusat ngambu
Lalau ngapehe itah batantu

Bujur itah marega ewen
Pemerintah je aton intu kalonen
Tapi amon gawi dia sing ise reken
Itah kapehe dia lue-luen

Dia itah manolak oluh je dumah
Sama kalonen je uras itah
Tapi itah tempon huma pasah
Ela impahumong tuntang injajah

Manyarita ka ngasi je utus Dayak
Baya ulihku huang karungut tandak
Marak ateiku sama kapehe rusak
Danum mataku batusuh nampurak.

Kiieeeew!

PAHARI hong DUMAY

Balaku ampun baribu rata
Dengan kakare je tundah kula
Pahari je aton hong dunia maya
Miken tege kare kutakku sala

Aluh itah jarang hasupa
Hataharep bau hatampayah mata
Bara kejau itah hatangkenya
Ateiku sanang dia ulih inyarita

Dengan Pa Agustiman J. Namang aku kasene
Pandita bakena rajin tatawe
Suami ideal ie inggare
Suntu bahalap akan ikei hatue

Pa Sergius P. Tigoi aku sanang tutu
Ie sederhana atei balemu
Akangku ie akan indu suntu
Pandita asli itah Dayak Ngaju

Pa Kristinus Unting dia ulih inyarita
Pandita senior tutu bijaksana
Aluh bakas samangat tatap tabela
Motivator basewut hong ngaju ngawa

Ije hindai aku hasupa
Tokoh je pintar paham barega
Pak Marx Mahin ahli budaya
Arae basewut hapus dunia

Dg Pa Robi Aser Ka'ef hasupa hanjulu
Pandita inugas intu Baun Bango
Tatap samangat aluh intu lewu
Mudahan ie halajur ingagulu

Pa Markus Piet Ranan pdt emeritus
Huang kabakas malayani tarus
Gawi bahalap dia tau lepah hapus
Suntu bahalap akan generasi penerus

Eknamensi Tawun pajabat negara
Randah atei tuntang bajenta
Rajin ngobrol hureh habaka
Sanang atei amon itah supa

Denny Hosang ewendue Lelly Denz Hosang
Pasangan serasi halajur ingenang
Nanture ewen mawi atei sanang
Penampilan modis sama kilau bujang

Pahari je beken batantu are
Bakas tabela bawi hatue
Dia ulihku manyewut keton mije-mije
Aku hanjak itah jd hakasene

Tutu itah dia puji hatanture
Hasundau biti hatampayah mate
Pahari je melai intu kanih kante
Aku manyampai horumat tabe

Aku sanang itah hureh habaka
Dengan keton intu dunia maya
Dia ganan itah ije isi daha
Anggapku keton akan kaluarga

Sama arep itah hakarasan
Awi hampahari itah huang Tuhan
Je bakas manenga suntu taladan
Je tabela manduan akan padoman

Awi karakat je uras itah
Oluh luar sanang manampayah
Manjadi tarang je tuntang uyah
Taluh je kaput tau inyingah

Amon tege kare tundah kula
Huang kapehe melai dunia
Itah je beken tau dumah maja
Manenga ampung magah lakudoa

Lewu dumay keleh ingguna
Akan je bahalap tuntang barega
Itah manggau kare tundah kula
Ela mahapan akan gawi sala

Sampai hetuh karungutku helu
Ingirimku hayak riwut balemu
Akan pahari intu dumay lewu
Aku manyewut salamat andau Minggu.

Kieeeew!

PASIE ANAK KAHIU

Paramisi hanjulu umba mahalau
Manyarita atei ku je galisau risau
Nanture ampin taluh penda andau
Masalah jituh puna palalau

Aku manyarita ateiku tutu masi
Katulas kalonen je jadi mawi
Katinduh belum jadi jatun ati
Marusak himba dia kan haluli

Aku masi dengan anak kahiu
Kahiu kurik masih balemu
Imaksa pisah bara bapa indu
Awi kalonen paham bajuhu

Anak kahiu hapangkut rantep
Handau hamalem santar masi arep
Atei bahimang sama kilau nejep
Kapehen huang bilang sukup genep

Jatun hindai je eka masan
Lepah himba ineweng nganan
Indu bapae impatei mengan
Anak kahiu salamat awi asin Tuhan

Tapi belum sama kilau matei
Santar mananggung kapehen atei
Jatun hindai kayu akan inyakei
Lepah himba lepah padang uei

Petak Dayak ekaku inakan
Petak tinduh jatun bandingan
Anak kahiu kea anak bakantan
Hanjak rantang bara jaman huran

Sana dumah kare perusahaan
Manggau panatau kare bulau intan
Intu petak Dayak Kalimantan
Katinduh belum irusak nduan

Mungkin awi jaman tuh jadi maju
Oluh kalonen paham bajuhu
Dia masi dengan kare satua metu
Lepah himba lepah kare kayu

Sana keton manyarang dumah
Kalonen bajuhu lalau sarakah
Kayu neweng kare himba lepah
Anak kahiu jatun huma pasah

Amon mangganang anak kahiu
Ateiku pehe sama hiris sambilu
Indue bapae impatei munu
En awi ewen baya satua metu?

TAHIU UTUSKU Part. 3

Sinde hindai aku handak mangutak
Pahayak auh karungut tandak
Tahiu utusku je tege hunjun petak
Utus Dayak je bara sulak

Aku handak hamauh isut
Pahayak auh tandak karungut
Tahiu utusku je menteng mamut
Utus Dayak je paham basewut

Tahiu ampin itah je wayah jetuh
Utus itah huang bentuk oluh
Utus Dayak nampara tapangaruh
Adat je dumah dia sanonoh

Bujur itah utus huma gantung
Utus Damang tuntang Tamanggung
Ela itah jajuan kahumong
Dia hakun bakalah bakehem jukung

Kapehe atei nanture utusku
Dia tau hinje santar hakabehu
Pahari mandai ingujuk manjatu
Kula hong penda nalua kilau metu

Apalagi wayah kare pilkada
Mamilih gubernur kea walikota
Sama arep hakutuk hasapa
Dia hatingak oluh ije huma

Narai kea je rabut nangkian
Butup amas balanga intan
Kula pahari injakah nganan
Keleh barendeng atei pikiran

Ela itah hakalahi kajama
Mangalahi taluh je dia baramana
Haranan keyakinan tuntang agama
Awi ambisi melai dunia

Amon pahari jadi Tamanggung Singa
Kula je beken handak jadi Raja kea
Itah palalau hakaridu laya
Utus beken balalu dinun eka

Amon itah pusit bakarak
Utus luar tatawe hanjak
Uras induan kare anis enyak
Itah manyare kahulu katarak

Amon kalotuh sapanja-panjang
Utusku lilap lepah nihau hayang
Kilen ampi itah tau hagatang
Sama arep hakayau hatasang

Wayah jituh beken kilau huran
Budaya hakayau keleh inganan
Dia sesuai dengan kemajuan jaman
Sama arep keleh hadohop hakarasan

Kalote ampin je utus itah
Mawi ateiku pehe bakarah
Kilen belum tau salawah
Manaharep oluh are taheta dumah

Amon itah tau belum hinje
Budaya je sala bahali tame
Penyang belum ain tambi bue
Meteng hong kuluk, njarat intu lenge

Kapakat kahinje jite mambatang
Mangat belum tau hagatang
Utus itah belom mangat sanang
Dia kalah awi oluh manyarang

Sampai hetuh helu auhku isut
Pahayak riwut tandak karungut
Dia awi katamam tuntang ka mamut
Aku hanjak utusku lampang basewut

Laku ampun amon kutakku sala
Manyinggung parasaan kare tundah kula
Maklum je tuh baya kambang jela
Je sala nganan, je bahalap ingguna.

Kieeew...!

SUNTU

Narai kabar kawan pahari
Kueh keton uras benyem suni
Mina mama kea kaka andi
Bakas tabela hatue bawi

Paramisi hanjulu dengan uras itah
Dengan keton aku handak basorah
Manyampai isut auh tandak kesah
Mangat belum marajaki batuah

Manahiu ampin itah melai dunia
Bawi hatue bakas tabela
Mangat belum bahalap barega
Kejau bara sasat calaka

Itah je bakas manenga suntu
Mangat je tabela dia kaliru
Tuah rajaki uras tau dinu
Jalan bahalap jite inintu

Ewen je tabela akan mananture
Itah je bakas je jadi kasene
Ampin pambelum kalonen are
Je bakas sala ewen kapehe

Amon itah sala manenga
Tingak ajar peteh patua
Ewen umba jalan je sala
Itah je bakas umba badosa

Suntu bahalap tege intu huma
Bara kurik jadi nampara
Kare tingak peteh patua
Akan imbit ewen sampai bakas jeha

Suntu bahalap keleh inenga
Akan kakare anak tabela
Dia baya huang totok jela
Tapi kea huang kare gawi nyata

Dia baya itah tau maningak
Mahapan kare pander kutak
Akan majar kare kawan anak
Mangat ewen tau numon kahandak

Suntu bahalap huang karen gawi
Mangat kahandak tau manjadi
Anak jarian tau pintar harati
Sakola gantung dia balihi

Awi jaman jadi barubah
Adat budaya taheta dumah
Tau mamparusak kare anak itah
Dengan Hatalla bewei itah manyarah

Tahiu ampin parubahan jaman
Adat budaya je dumah rahian
Beken ampi bara wayah huran
Tau marusak anak jarian

Awi tutu itah je bakas
Mahaga ewen jatun kaabas
Pai lenge itah puna lalau tapas
Intu luar kanih palalau bebas

Ije kaharap puna jatun beken
Bara ka kikeh je dia luen-luen
Keleh Hatalla mahaga ewen
Bara karusak intu kalonen

Sambil manenga kare tingak ajar
Mangat anak harati pintar
Kejau pangaruh dunia luar
Amon ewen balua miar

Sampai hetuh auhku helu
Dia panjang baya hanjulu
Mangat itah tau manenga suntu
Mudahan indohop Hatalla ngambu

Kieeeew!

TAHARU

Oluh hatue munduk manure

Murut usuk atei kapehe

Bilak mahantis je danum mate

Lalau are angat pangkeme

Lalau kea angat je kalotuh

Ngambutep mate dia tau tiruh

Atei balemo angat lulu lenyuh

Masi arep sama anak oluh

Nganderangku tandak deder kandayu

Mangesah ateiku paham taharu

Ngirimku hayak riwut balemu

Manyampai angatku bara lewu keju

Paham angat kataharun huang

Dengan keton je indang apang

Lewu kejau Panarusan Purang

Lewu asal kare tatu hiang

Mangganang arep jaman kurik huran

Saran danau Tasik Payawan

Tame himba tulak mamengan

Manetei kayu akan tabengan

Kalotuh angat huang eka kejau

Taharu atei puna dia tau nihau

Atei ku balemo puna palalau

Mudahan bereng dia gila layau

Amon andau jadi halemei

Munduk manure kapehe atei

Mangganang ampin kare tanjung tetei

Kilau belum baya kabuat bewei

Masi arep kapanatau jagau

Dengan kula tapisah kejau

Atei huang halajur talingau

Dengan keton handak tutu hasundau

Dengan kula kejau tapisah

Kataharun huang bilak dia tau lepah

Parasaan angat santar batawah

Kilau juhu je kurang uyah

Akan pahari je miar kanih kante

Mungkin sama angat pangkeme

Mambelum arep sama anak nule

Kula jalahan kejau bara mate

Kalote ampin je olun itah

Malihi lewu kare huma pasah

Jalahan kejau bara tampayah

Belom bahalap jite inyasah

Kinjau atei handak buli lewu

Pai kilau tajarat dia ulih bagetu

Andau naharep je akan inuju

Mangat belum dia kilau helu

Mingat belum dia akan kabuat

Anak jarian tege intu balikat

Manekang hambaruan mangat santar kuat

Mudahan sampai kare hajat niat

Baya ije manampa atei lapang

Amon angat jadi lalau pusang

Anak jarian akan usik nimang

Manampa salawah kare atei huang

Balaku ampun kawan pahari

Uras keton genep kula biti

Dia aku balaku kana asi

Baya mangesah angat je manaripi

Sampai hetuh kesahku helu

Manyarita atei ku paham taharu

Dia ulih manyambung keleh inggetu

Danum mate ku mahantis nanturu

METUH AKU TABELA

Jetuh saritan aku jaman huran
Tarus tege intu ingatan
Dia akan nihau dia inganan
Akan paingat anak jarian

Tahiu pambelum jadi ihalau
Katahin andau baganti andau
Ingatan jetuh dia hayang nihau
Jadi anggapku kilau panatau

Huang lewu Tasik Payawan
Saran batang danum Katingan
Panarusan Purang ekaku inakan
Lewu tatu hiang bajaman-jaman

Bujur belom je asi-asi
Kapehe atei jatun manaripi
Lewu kurik jatun karami
Pambelom jite dia kan haluli

Sana andau jadi balawa
Ikei tulak ka padang himba
Tulak ka danau melai likut huma
Manggau lauk malan manana

Ikei misik hanjewu tutu
Umai manyadia kare bari juhu
Nyadia bahata kare pisau lunju
Tulak kahimba sambil mandup metu

Sapanjang sungei ikei mambesei
Burung tingang tarawang haretei
Anak buhis tuntang anak bakei
Hanjak rantang mananture ikei

Hunjun batang tilap je gantung
Eka sarangan je burung tiung
Anak tiung aman ngalindung
Handak atei manawan burung

Amun andau jadi halemei
Ikei buli dg hanjak atei
Mimbit pandinu aluh isut bewei
Cukup akan kaluarga ikei

Jetuh kesah metuh tabela
Imbelom awi je padang himba
Garu manyan tuntang damar gita
Metu satua uras inenga

Beken hindai je wayah jetuh
Itah rusak awi budaya uluh
Petak danum uras hancur lenyuh
Metu satua lepah inderuh

Sampai hetuh kesah ku isut
Pahayak riwut tandak karungut
Amun maaf amun kutakku luput
Manderuh ketun jatunti maksud

Kiiieeww !

AUH PETEH

Halemei jituh ujan tutu labat
Pahayak guntur tuntang nyahu kilat
Ikau anak batiruh mangat
Aku bapam ngalamun kabuat

Batiruh anak malati kambang
Bawi nyai kaleka huang
Aluh ujan tuntang riwut kancang
Nyahu kilat ela ingganang

Batiruh anak je bawi nyai
Batiruh anak pintar harati
Kakenang atei ela manggapi
Aku bapam dia akan malihi

Metuh jituh ikau kurik tutu
Pai lengem masih balemu
Hindai ulih ka ngawa ngaju
Balaku Tuhan halajur ngagulu

Amun ikau jd hai jeha
Jd miar malihi huma
Santar mingat kare peteh patua
Balaku Tuhan halajur manjaga

Huang iman ikau segah mendeng
Keleh belom barende-rendeng
Masi arep tuntang biti bereng
Ela mipen panatau mantereng

Are tingkes melai dunia
Ela umba jalan je sala
Auh Tuhan halajur ihaga
Andak hung atei tuntang totok jela

Ela mangganang ramun kalonen
Karami jite jatun lalangen
Aluh kasanang halajur mampipen
Limbah jite kikeh tuntang katarewen

Aku bapam halajur mampingat
Auh jetuh dia je iha-ihat
Mudahan ikau belom sanang mangat
Aku bapam tege intu balikat.

KAPEHEN ATEI BURUNG TINGANG Part. 2

Mias angat kapehen atei huang
Sama hiris sambilun humbang
Parasaan bilak tarus manangis hetang
Mangganang petak danum ain tatu hiang

Kueh ekae maina atei pikiran
Kare himba lepah irusak inganan
Dia mamikir pambelom harian
Mawi arep sama kilau Tuhan

Kasarakah belom ela nantumba
Keleh mingat nasib anak esu jeha
Kare harta dia keton imbit matei kea
Manggau panatau bilak dia barima

Kaseimbangan belum perlu ihaga
Kare kayu tuntang metu satua
Mangat keton dia tulah kana sapa
Lepah lumat matei kana bencana

Hakarang indang hakarang apang
Lalehan kapurun jata sangiang
Manalua kalonen dia bapikir panjang
Maisi kanai dia tara suang

Ela kalonen madu kamameh
Mikeh petak danum dumah mambaleh
Mawi keton tarewen hagenjeh
Auh jetuh puna dia akan hureh

Burung tingang terai nganderang
Danum mata bilak lepah keang
Nihau kasabar awi atei pusang
Nunggu keton ie dumah manyarang

Ie tingang esun kayau asang
Dia mundur aluh ketun are duit uang
Awas keton ela sala dahiang
Ie mimbit lunju mandau talawang.

Loo..lo..looo...kiiiieeeew.

#bulibaragereja_balalunihaudamaisejahtera_awimambasabarita#

BURUNG TIUNG BALAWUNG BULAU

Salamat hasundau kula jalahan
Taharu ateiku dia ulih inahan
Mudahan riwut maagah pansanan
Pahayak riwut tanding tampengan

Aku taharu manyampai auh
Mahalau tandak aku hamauh
Je ingumangku hanjewu subuh
Pahayak ambun muhun baduruh

Himungku suling nekapku gandang
Palembutku karungut bara atei huang
Inyampaiku angat je jadi ingumang
Tahiu pambelum je dia panjang

Mahalau tanding aku hamauh
Tahiu ampin itah kalonen oluh
Sapanjang belum jadi inampuh
Hing penda andau kalonen jetuh

Kilau burung aku mananding
Jatun gunae harta hagining
Amon belum sala manyalangking
Peteh patua di ihining

Kilau tiung balawung bulau
Keleh mahias huang kuluk lingkau
Jatun gunae harta panatau
Amon pikiran santar gila layau

Kilau tiung babulu babilem
Ela umba karami hamalem
Aluh angat santar suni benyem
Auh oluh dia akan duem

Kilau tiung belum marandah
Tempue inomun dia habantah
Dia mprahan kare kagagah
Auh inyeneh dia inombah

Burung tiung balawung amas
Tiruk itung keleh ihias
Ije mambatang bereng barigas
Jatun kakurang tuntang katapas

Amon tiung nampara hamauh
Hanjak uras gagenep oluh
Aluh atei angat kapehe lenyuh
Palus sanang sadingen tinduh

Aluh tiung  puna satua metu
Belum ayue tau indu suntu
Belum marandah atei balemo
Amon hamauh ie bujur tutu

Amon tiung huang eka keju
Oluh are santar taharu
Kan kueh ie halajur inggau
Ie ingilak puna batantu

Jatun kahalap kare biti bereng
Aluh jatun harta mantereng
Amon pikiran harajur barendeng
Jite mahaga tampung tahaseng

Bahalap ampi je burung tiung
Ie nyarangan hong eka gantung
Aluh baya ije kungan burung
Ie barega dia ulih hitung

Dia awi bulu ie barega
Tampayah itah ie niha-niha
Tiruk itung je santar balawa
Jite mambatang intu dunia

Bulu jite baya luar bewei
Je mambatang kahalap atei
Kilau sumbu dia belep matei
Ie manyingah kare tanjung tetei

Kilau tiung akan tampengan
Auh jituh akan pedoman
Akan pambelum andau harian
Tingak ajar akan anak jarian

Sampai hetuh karungutku helu
Pahayak andau jadi hanjewu
Mudahan itah uras ingagulu
Awin Tuhan Hatalla ngambu

Kieeeew!

By : Tajaring kurik. Subuh, 8-4-2014

TAMUEI BURUNG TAJARING Part. 2

Munduk manure andau halemei
Mangumang pambelom jadi inetei
Burung kurik kejau namuei
Pambelom jite tisa kesah bewei

Munduk halemei ture andau ujan
Kapehen belom indu pangalaman
Akan padoman andau harian
Nyarita kesah akan anak jarian

Kejau jalanan jadi ihalau
Mandai bukit muhun akan luaw
Ampin belom hong penda andau
Tamuei lepah intu Pulang Pisau

Bukit inyakei sungei imbesei
Belom kejau hong lewu tamuei
Jite manjadi tagal asi bewei
Tahiu jite mangat barendeng hong atei

Pulang Pisau lewu te kula handiai
Eka burung kurik manetep melai
Hetuh nasib ampi jadi sampai
Kasusah huran ela mingat hindai

Pulang Pisau lewu tamuei
Hetuh dinun tanduhan atei
Kawal belom balalu sampai matei
Jite manjadi tagal asi bewei

Ampun maaf dengan uras itah
Dia tagal katamam aku mangesah
Tahiu belom jd inampayah
Dia haranan kaabas tuntang kagagah

Awi jete kawan pahari
Ela mikeh aluh belom asi-asi
Amon Hatalla manenga berkat asi
Kasusah itah uras tau ingganti.

Amon tajaring jadi taharu
Dengan lewu kejau tege hong ngaju
Atei angat kana hiris sambilu
Danum mate halajur mahantis nanturu

Dengan umai bapa paham manggau
Pahari ije kalambutan tuntang jetatu
Pahiu kacapi hayak riwut balemu
Mahimun suling buluh marindu

Sampai hetuh kesahku isut
Harian andau itah malanjut
Burung tajaring munduk taungut
Mangumang belom pandehan andau kaput.

Kieeeew!

HASUNDAU HONG NUPI

Hayak karungut aku manyundau

Awang pahari je tukep kejau
Pahayak pahiau ujan nanterau
Tuntang kilat je nyahun andau

Aku handak manyarita nupi
Oluh hatue belom je asi-asi
Inyundau awi ije biti bawi
Malisen malenak hayak baputi

Oluh hatue batiruh tojah
Huang nupi ie balalu dumah
Mudahan jituh taluh manuah
Masi oluh hatue puna belom susah

Metup merau daha nahasau
Sana aku mananture ikau
Tagarak atei kapanatau jagau
Lalehan kahalap oluh bawi jikau

Bau matam puna bakena
Bapander balemo hayak bajenta
Lalehan katulasmu hanjulu manyupa
Ikau baya lembut huang nupi kampa

Sana andi jadi hamauh
Jantung atei angat baduruh
Lalehan jatun kapasin taluh
Iye manyupa huang kantuk tiruh

Narai palakum je ikau kaka
Sarai hetuh kue hasupa
Andi hamauh mambuka suara
Hatue benyem nanture penda

Hagerek utut oluh hatue
Manyeneh pander taluh kalote
Pander balemo hayak tatawe
Bahimang jantung atei kapehe

Handak atei hatue basarita
Kilen ampim dengae puna jatun daya
Sama kilau kana kaji patua
Nampayah kahalap intan garinda

Lalehan katulas je ikau andi
Dengan aku kakam belom asi-asi
Baya manyundau aku huang nupi
Aku misik ikau palus jatun ati

Hatue misik harikas mendeng
Manyaup bau mangat barendeng
Lalehan ikau andi dia masi bereng
Dengan aku kakam tarung ije leteng

Kakueh darim je ikau andi
Manggau ikau palus jatun ati
Jatun beken bawi akan pangganti
Atei angat kana sambilu banyihi

Kalote auh je isut kesah
Oluh hatue je belom susah
Huang nupi bewei ie aton dumah
Limbas jete lilap bara tampayah

Kieeeww!

TAMUEI BURUNG TAJARING

Salamat hasundau kula jalahan
Mahalau tandak tuntang tampengan
Kesah jituh baya kiasan
Sala khilaf ela induan

Hetuh aku handak basarita
Ampun maaf amun kutak ku sala
Tahiu burung tajaring tabela
Bara hete kesah tuh inampara

Burung tajaring belom asi-asi
Nomor due bara lime pahari
Biti kurik bilak dia tau hai
Susu jatun baya danum bari

Metuh burung puna kurik tutu
Tajaring haguet malihi lewu
Atei kilau inyayat sambilu
Manyasah nupi manggau ilmu

Tarawang kejau kan kanih kante
Mambelom arep sama anak nule
Maklum belom puna kapehe
Kuman jandau dia kadue

Manahiu angat kare kanahuang
Tarawang kejau ela ingganang
Mangat nihau kare atei pusang
Nihau hayang sapanja-panjang

Amun taharep kula je beken
Tajaring kurik puna mahamen
Kasusah atei jatun lalangen
Manyare arep mangejau ewen

Rancak mahantis je danum mate
Mangganang nasib taluh kalote
Bereng paringkung atei kapehe
Ela kalotuh je hante-hante

Pungut atei burung tarawang
Kinjap bereng hdk nihau hayang
Atei pehe pikiran pusang
Huma kejau santar ingganang

Bukit inyakei sungei imbesei
Halisang kejau burung namuei
Panatau barega dia harta bewei
Manggau kasanang tege hong atei

Aku mangesah burung tajaring
Mudahan ketun dia rise mahining
Burung kurik baya akan tanding
Tahiu belom hdk manyalangking

Kejau jalan jadi inetei
Katahin burung jadi namuei
Are pangalaman barega bewei
Bahata belom balalu sampai matei

Syukur baya akan Hatalla
Burung kurik dia hayang banaya
Pangalaman belom puna barega
Burung kurik dinun asi sinta

Dia tagal kaabas tuntang kagagah
Amun belom tau bujur buah
Awi asi puna mangarinah
Jete peteh tege intu kesah

Sampai hetuh sarita insanan
Burung tajaring baya ije kungan
Auh bahalap tau induan
Kutak je sala dohop inganan

Kiieeeww!

KAPEHEN ATEI BURUNG TINGANG

Balaku ampun baribu ampun
Dengan pahari awang je atun
Balaku maaf manderuh ketun
Manyeneh karungut awang je hakun

Aku hdk nahiu burung
Tingang tarawang je sasar gantung
Auh palapas nyaring nantengung
Burung je beken hadari ngalindung

Amun tingang jari nganderang
Tarewen daha manggatar ijang
Sama kilau nyahu je wayah pandang
Burung je beken hadari rajang

Hetuh aku nyarita tingang
Kapehe atei are je ingganang
Petak danum sama kilau nasang
Hancur lulu awi sawit tambang

Tingang tarewen harikas mendeng
Kayu gantung uras ineweng
Leha-lehan kapasin bereng
Angat bagetu tampung tahaseng

Tingang nyarenan kapehen atei
Angat pangkeme sabalah matei
Tambalik bukit tambalik sungei
Uras sawit tambang haretei

Tingang tarawang kan hila timur
Petak danum uras jd hancur
Palapas balemu uhat tulang tendur
Lehan kapurun kalunen maatur

Tingang tarawang kan hila barat
Kayu gantung uras irukat
Jantung kapehe atei babehat
Handak tingang mahamuk bahimat

Tingang tarawang kan hila je beken
Kapehen atei dia luen-luen
Lepah karuing lepah tabalien
Leha-lehan kajuhun kalunen

Tingang menter ngambutep matae
Mangarendeng pikiran tuntang isi dahae
Sambil manggau je angat hilae
Taluh kilau jituh jatun haranae

Kayu gantung lepah inganan
Jatun hindai eka nyarangan
Kilen ampin nasib anak jarian
Tau belum andau harian

Danum mata bilak hanti-hantis
Atei tingang sama kilau hiris
Kapehen huang dia ulih ilukis
Mungkin jetuh nasib inggaris

Sampai hetuh saritan burung
Harian andau itah manyambung
Pahayak kacapi gandang garantung
Pahayak rabab tuntang kangkanung.

Kiiiieeeew!

TAHIU UTUSKU

Salamat hamalem kawan pahari
Bakas tabela hatue bawi
Kawan kaka tuntang kawan andi
Mina mama kea bue tambi

Salamat hasundau kula ku utus Dayak
Gagenep itah je tege hunjun petak
Salamat hasundau huang karungut tandak
Mudahan ketun uras sanang hanjak

Aku galisah dia tau batiruh
Mangganang ampin taluh wayah jetuh
Ateiku pusang bereng ku uyuh
Pikiran jituh dia manyanonoh

Pahayak riwut aku manyundau itah
Manyarita ateiku tutu galisah
Angat jituh hdk aku mangesah
Miar andau santar batambah

Mahalau karungut aku mansanan
Kapehen atei ku dia ulih inganan
Tahiu nasib utus itah je harian
Irusak awi perubahan jaman

Petak danum ayun tatu hiang itah
Lepah rusak awi kawan panjajah
Jatun tisae puna hancur lepah
Atei lenyuh amun manampayah

Tempun kamangat utus je beken
Utus itah jd jungus jipen
Lalehan itah dia mahamen
Kapehen ateiku dia lue-luen

Kilau tanding kare tambi bue
Tempun petak itah manana sare
Oluh luar batambah are
Itah kalahi dia tau hinje

Mbuhen itah dia tau pakat
Kilau jihi manggatang bahat
Bahalap tutu amun itah rakat
Itah je isut batambah kuat

Tege hindai ngapehe atei
Are je maurus baya arep ah bewei
Kula nalua bilak handak matei
Kejau penyang je hinje simpei

Petak danum keleh sama mahaga
Ela injual dia baramana
Kuntep panatau je paham barega
Akan warisan anak esu jeha

Pahayak karungut aku manyampai
Akan pahari kula handiai
Itah belom baya hanjulu haliai
Pasi anak esun itah je melai

Kiieeeew!

PATIRUH ANAK

Ayun tuyang je ayun tuyang
Batiruh anak intan lamiang
Batiruh anak kaleka huang
Sarai bapam hindai halisang

Batiruh anak je puntir busu
Batiruh anak aluh hanjulu
Batiruh anak ela ikau ridu
Pandehan indum barapi manjuhu

Gitam andau jadi halemei
Katawam bapam sambil pehe atei
Hanjewu jewu bapam namuei
Manggau akam anak burung punei

Ela anak santar manangis
Atei bapam sama kilau hiris
Batiruh anak keleh benyem tunis
Danum matan bapam hdk mahantis

Batiruh anak malati kambang
Pandehan indum hanjulu halisang
Kasusah belom ela itah mangganang
Kapehe jituh dia sapanja-panjang

Jewu bapam handak haguet
Manggau akam anak kalawet
Batiruh anak ela ikau carewet
Pandehan indum munduk manjawet

Batiruh anak andau handak ujan
Kasusah belom ela insanan
Kanai balau dia ulih nahan
Bapam hetuh atei marawan

Mudahan anak mangat batiruh
Bapam manuyang marak atei lenyuh
Mudahan tege kapasin taluh
Andau jewu dia kalotuh

Batiruh anak je bawi nyai
Sanang atei aluh huang nupi
Ikau melai keleh rati-rati
Bapam namuei dia akan tahi

Bapam tulak atei babehat
Pasi indum mahaga ikau kabuat
Kilau kayu tajawut bara uhat
Mudahan bapam buli salamat

Ayun tuyang je ayun tuyang
Batiruh anak eka kasayang
Jewu bapam haguet halisang
Manggau akam anak burung tingang

Bapam namuei ka padang himba
Haguet hanjulu malihi huma
Pasie indum kabuat mahaga
Maurus ikau puna dia tau laya

Batiruh anak ela galisah
Ela mangganang aluh belom susah
Bapam halisang mudahan jeleng dumah
Maimbit tambang akan kaluarga itah

Kieeeww!

TAHIU UTUSKU Part.2

Salamat hamalem uras tundah kula
Kawan pahariku intu ngaju ngawa
Aluh hasundau hong dunia maya
Ateiku kuhanjak dia ulih inyarita

Aku manyambung tandak karungut
Ingirimku tinai pahayak riwut
Tahiu utusku je menteng mamut
Utus Dayak halajur basewut

Utus je belom bara jaman huran
Utus asli pulau Kalimantan
Mamut menteng jadi semboyan
Auh jete ela sampai inganan

Wayah jetuh amon aku mangumang
Paham kapehe angat atei huang
Utusku nampara hdk nihau hayang
Awi kawan panjajah dumah manyarang

Laku maaf kawan pahari
Ela ketun dengangku basingi
Awi aku jd manampayah bukti
Utus Dayak ku puna asi-asi

Ije inyewutku kawan panjajah
Kalonen je dumah lalau sarakah
Petak danum itah je tutu lombah
Uras parusak nambalik lepah

Amon itah sama mananture
Tempun petak itah manana sare
Kilen atei itah dia kapehe
Nampayah utus itah awi kalote

Utus itah dia ulih mangahana
Oluh dumah bara ngaju ngawa
Kilau tanding ewen je maja
Harus marega itah tempun huma

Tapi kilau tuh jd tambalik
Tempun huma itah lepah hunjek nandik
Bara urusan je hai sampai je kurik
Satiar usaha sampai urusan politik

Itah kalah awin kare pangusaha
Utusku rusak kana adu domba
Mangat petak danum injual injaja
Jatun tisae akan anak esu jeha

Kare kayu tuntang metu satua
Dia ndai ingalindung dia injaga
Amon ujan itah lepah lelep bisa
Wayah pandang itah bakehu baseha

Tege hindai je marusak bahimat
Masalah jituh puna babehat
Anak jarian itah sakola dia tamat
Mihup babusau irusak kare obat

Kilen ampi amon jd kalote
Andau harian itah batantu pehe
Awi pandumah kalonen are
Oluh kabentuk itah manyare

Nanture hindai kawan tabela
Manampa atei santar kacewa
Kutak pander sara habasa
Identitas dayak dia ihaga

Sana oluh dumah bara ngaju ngawa
Nampara nihau kare adat budaya
Anak oluhan dia kasene karungut sansana
Manginyah manasai inggati joget badansa

Awi te pahari keleh itah barendeng
Keleh itah uras segah mendeng
Manggantang utus je mamut menteng
Tarung saritae dia nihau leteng

Auh jituh dia je ihat-ihat
Mangat itah tau sanang mangat
Dia halajur belom malarat
Jadi jipen intu huma kabuat

Kiieeew!